SIDO YAWATAKA WANANCHI KUJITUMA NA KUTAFUTA MIKOPO

Filbert Rweyemamu Arusha.

Meneja wa Shirika la Viwanda vidogo (Sido)mkoa wa Arusha,Isdore Kiyenze amesema tabia ya uvivu na woga wa kuchukua hatua waliyonayo wananchi wengi imekua kikwazo cha kujiletea maendeleo.

Akizungumza kwenye mahojiano maalum na blog hii  ofisini kwake eneo la Gereji Unga Limited ,amesema fursa za kuwatoa katika hali ya umasikini zipo nyingi  ila wananchi wengi hawapendi kujishughulisha  ili kufikia malengo wanayoyataka.

“Watu wengi ukiwauliza kwanini sio wajasiriamali watakwambia hawana mitaji,na ukiwauliza wameshafika kwenye taasisi ngapi  za fedha kufatilia mikopo, majibu yao ni kuwa hawakopesheki bila hata kwenda kuwaona maafisa wa mikopo,”alisema Kiyenze

Amesema tabia hiyo imesababisha fursa nyingi za kujiendeleza kuchukuliwa na wageni,huku wananchi wakibaki kuwa watazamaji na kulalamikia ugumu wa maisha ambao hauondolewi kwa kukaa vijiweni bali ni kuacha uvivu wa kufikiri na kuchukua hatua za ujasiri.

Kiyenze amesema katika kuwawezesha wananchi Sido imekua ikitoa mafunzo ya ujasiriamali kwa wananchi mbalimbali na kuanzisha Umoja wa wasindikaji Vyakula nchini(Tafova)ili kuwawezesha kuunganisha nguvu zao kupata mashine za kutengeneza vifungashio.

“Sekta ya Vyakula hatujaifanyia kazi ipasavyo,kwa muda mrefu tumekua tukiuza mali ghafi jambo ambalo halina tija sana  kwetu,jambo la msingi ni kusindika bidhaa za vyakula ili kuongeza thamani na kipato,”alisema

Ameongeza kuwa changamoto ambayo imekua ikiwakabili wajasiriamali nchini kukosekana vifungashio vyenye ubora wa kumvutia mnunuzi na kwamba umoja walioanzisha utawawezesha kuanza kutengeneza vifungashio ambavyo vitaongeza chachu ya uzalishaji.

Amesema lengo la kuanzishwa umoja huo ni kuwawezesha  wajasiriamali wadogo  kupata nguvu ya kukopesheka kwenye taasisi za fedha na kuwa na nguvu ya kushindana katika masoko.