AIR UGANDA YAANZA KUUTMIA UWANJA WA KILIMANJARO

AIR UGANDA KUTUA KIA

Arusha

 Shirika la ndege la Uganda (Air Uganda) limeongeza KIA kuwa kituo kipya katika vituo saba ilivyokua navyo awali na kuonesha hatua kubwa iliyopigwa na shirika hilo lililo na makazi yake Entebe Uganda, katika sekta ya  soko lake Africa Mashariki.

Baada ya kutua kwa mara ya kwanza ndege hiyo yenye namba U7331 iliyokua imebeba abiria wapatao 19 wakiwemo viongozi wa shirika hilo na baadhi ya watalii katika uwanja wa kimataifa wa Kilimanjaro, uzinduzi huo ulifuatiwa na hafla fupi iliyowaweka wadau pamoja.

Akizungumza katika hafla hiyo Kaimu Mkurugenzi mtendaji wa KADCO bwana Bakari Murusuri alisema “Ni furaha kubwa kuwakaribisha ‘Air Uganda’ katika kiwanja chetu cha kimataifa cha KIA. Tunaamini kuwa shirika hili litafurahia huduma zetu hapa KIA kwani wamechagua eneo sahihi lilozungukwa na fursa nyingi kiuchumi kama Utalii”

Akiushukuru uongozi wa KADCO kwa mapokezi mazuri na ushirikiano waliouonyesha katika uzinduzi wa safari mpya ya Kilimanjaro Mkurugenzi mtendaji wa Air Uganda Cornwell Muleya ameahidi kutoa ushirikiano wa hali na mali na kusema kuwa hii  ni fursa kubwa ya kukuza uchumi wa Tanzania kupitia Utalii.

  

Nae Meneja Maendeleo ya kibiashara Bi Christine Mwakatobe alisema...... “Tunajivunia kuongeza mashirika ya ndege ya kimataifa kutua hapa KIA moja kwa moja kutoka katika nchi zao. Mwaka jana tulipokea mashirika mbalimbali kama Kenya Airways, Qatar Airways, na Turkish Airlines na hii inathibitisha juhudi za makusudi tunazozifanya kupanua wigo wa soko letu”. Aliongeza kwa kusema “mbali na mashirika yanayofanya safari zake ndani ya nchi kutoka kiwanja cha kimataifa cha Kilimanjaro yanayosimamiwa na KADCO, mashirika mengine ya kimataifa ni pamoja na KLM, Ethiopian Airlines, Emirates, Turkish Airlines, Kenya Airways, Qatar Airlines.”

Air Uganda itafanya safari zake mara nne kwa wiki na ndege nambari CRJ-200 katika ruti ya  Entebbe – Kilimanjaro – Mombasa.