MGOMBEA URAIS WA CCM DK MAGUFULI AWATANGAZIA VITA KALI KWA MAJAMBAZI WA NDANI YA TANZANIA NA NJE BUGIGWE KIGOMA

  

Mgombea urais kwa tiketi ya CCM, Dk John Magufuli akizungumza na wakazi wa wilaya ya Buhigwe mkoa wa Kigoma jana, akiwaomba wampigie kura pamoja na wagombea ubunge na udiwani kupitia CCM
 
MGOMBEA urais kwa tiketi ya Chama Cha Mapinduzi (CCM), Dk John Magufuli, ameahidi serikali yake itaimarisha uhusiano na nchi jirani, lakini kwa kuonya wageni wanaoingia nchini kufanya uhalifu kwa kushirikiana na Watanzania, akisema wajirekebishe mara moja.

Aidha, ameahidi atakapochaguliwa kuwa rais, serikali yake itapanga namna ya kuboresha biashara za mpakani kwa kuhakikisha kunakuwa na uhuru miongoni mwa wananchi.

Dk Magufuli ambaye amesisitiza dhamira yake ya kutaka Tanzania iendelee kuwa kimbilio la wageni kutokana na amani, alitoa ahadi hizo jana katika mikutano mbalimbali aliyoifanya kwenye maeneo tofauti katika wilaya za Buhigwe na Kasulu, mkoani Kigoma.

Kiama kwa wahalifu
Akizungumza katika kijiji cha Mnanila Jimbo la Manyovu, Dk Magufuli alisema atahakikisha Tanzania inaendelea kuwa kimbilio la watu wote kwa amani na usalama.

“Tutaendelea kuimarisha uhusiano na nchi jirani, na wananchi watapangiwa namna ya kuboresha biashara za mipakani, kuwe na uhuru…dunia hii ni moja,” alisema.

Hata hivyo, alisema wapo watu wachache kutoka nchi jirani, wenye nia mbaya ambao wamekuwa wakishirikiana na Watanzania kufanya uhalifu hususani katika mikoa ya Kigoma, Kagera na Katavi.

“Niombe hao wachache wanaokimbia kutoka Rwanda, Burundi , DRC Congo, wanaotoka na mabomu, wengine na bunduki wengine wanakimbia kwa nia mbaya; ambao wanashirikiana na watu wa huku wenye nia mbaya, wanateka mabasi, wanaua watu, waache,” alisema.

Alisisitiza, “Kwa sababu tukiichafua amani ya Tanzania watakimbilia wapi? Kuwa mkimbizi ni kitu kibaya,”

Aliahidi kuwa wakimbizi kutoka Burundi wenye nia njema, watapewa uraia.

Akitoa mwito kwa watu hao kuacha mara moja, Magufuli alisema ilani ya CCM inasisitiza kulinda amani jambo atahakikisha analisimamia.

“Nataka haya yaishe… wale wenye nia mbaya wajirekebishe,”alisema na kuhimiza wananchi kutoa taarifa kwa vyombo na mamlaka zinazohusika na usalama wakiona watu wanaowashuku kufanya uhalifu.

Alisema imekuwa ni kawaida kwa mikoa ya Kagera, Kigoma, Katavi, mabasi kusindikizwa na polisi kwa hofu ya usalama. Alisema anataka chini ya serikali yake, utaratibu huo wa kusindikiza magari uishe.

“Kazi ya polisi si kusindikiza mabasi. Kazi ya polisi ni kulinda amani…wamo polisi ambao wamepoteza maisha yao kwa kupigwa na majambazi. Lakini wahalifu hawa wengine tunawakaribisha sisi wenyewe (wananchi), wengine tunawajua…ukimpata mtu ambaye unafikiri anatishia amani kwenye eneo lako, ripoti kwa vyombo vya dola,” alisema.

Akihutubia maelfu ya watu mjini Kasulu, alihimiza wananchi kuogopa wanasiasa wanaohubiri uvunjifu wa amani. Magufuli alisema, “watu wanaotaka kuchezea amani ya Tanzania, nitalala nao mbele.” Kukomesha matabaka Magufuli alisisitiza kwamba hataki serikali ya Watanzania wenye madaraja.

Alisema lengo lake ni kuhakikisha watu wa maisha ya chini, kati na juu wanakuwa sawa.

“Sitaki serikali ya Watanzania wenye madaraja. Kwangu madaraja yote ni sawa, watu wote wameumbwa na Mungu,” alisema na kusisitiza nia yake ya kutaka uchumi na maendeleo yapae.

Bima ya afya Aliahidi pia kuhamasisha bima ya afya kwa Watanzania wote.

Aidha katika mikutano kwenye maeneo mbalimbali, aliahidi serikali yake kuendelea kuwajengea barabara, kutatua tatizo la maji, elimu na pia kurekebisha bei ya kahawa.HABARILEO