BRAZIL YACHARAZWA 3-0, UHOLANZI YA VAN GAAL YASHINDA NAFASI YA TATU!

LUIZ Felipe Scolari mambo yamemdodea kabisa baada ya usiku huu kuchapwa mabao 3-0 na Uholanzi.

Ushindi wa Uholanzi ni zawadi kubwa kwa Louis Van Gaal ambaye ameiongoza kwa mara ya mwisho timu hiyo na sasa anaenda kuungana na klabu yake ya Manchester United.

Van Gaal aliyekuwa na malengo ya ubingwa amefanikiwa kushinda nafasi ya tatu katika michuano ya mwaka huu ya kombe la dunia baada ya kupigwa kwa mikwaju ya penati na Argentina katika mchezo wa nusu fainali.

Katika michuano ya mwaka huu, Van Gaal hajafungwa mchezo wowote ndani ya dakika 90. Mechi pekee aliyofungwa ni ile ya penati dhidi ya Argentina. 

Thiago Silva ambaye hakucheza mechi ya nusu fainali alimuangusha kwenye eneo la hatari, Arjen Robben mnamo dakika ya 3 na mwamuzi Djamel Haimoudi (Algeria)alitoa  penati iliyofungwa na Robin Van Persie kwa shuti la mguu wa kushoto.

Robin Van Persie akifunga bao la kwanza kwa mkwaju wa penati

Beki ghali zaidi duniani, David Luiz alifanya makosa makubwa yaliyosababisha Daley Blind aifungie Uholanzi bao la pili katika dakika ya 16.

Jamani majanga tena: Julio Cesar akiwalaumu mabeki wake baada ya   Daley Blind kuifungia Uholanzi bao la pili.

Wakati Brazil wakihangaika kupata angalau bao la kufutia machozi, mabeki kama kawaida wakiongozwa na Silva walifanya makosa na kumuacha Wijnaldum afunge bao la tatu katika dakika za nyongeza.

Mabadiliko aliyofanya Van Gaal ya kumtoa kipa Jasper Cillessen na kumuingiza Michel Vorm katika dakika za lala salama, yanamaanisha Van Gaal ameweza kuwatumia wachezaji wote 23 wa kikosi chake.