SHEIKHE MKUU WA AL AZHAR AKUTANA NA PAPA FRANCIS

• 

Kiongozi wa Kanisa Katoliki Duniani Papa Francis amekutana na Mkuu wa Chuo Kikuu cha Al Azhar cha Misri Sheikh Ahmad Tayyib katika kongamano la amani duniani ambalo limefanyika katika mji mkuu wa nchi hiyo, Cairo.

Akizungumza katika kongamano hilo, Sheikh Ahmad Tayyib amesema sababu kuu ya kuibuka ugaidi ni biashara ya silaha  na mikataba yenye kutiliwa shaka ya silaha ambayo hutekelezwa baada ya maazimio ya kidhalimu ya kimataifa.  Kabla ya kuanza hotuba yake, Sheikh Tayyib aliwataka hadhirina kusalia kimya kwa muda wa dakika moja kwa ajili ya kutoa heshima zao kwa waathirika wa ugaidi Misri na dunia nzima.

Akizungumza katika kongamano hilo la amani duniani, Papa Francis  alisema amani haiwezi kupatikana pasina kuwapa vijana mafunzo ya kuheshimiana na kufanya mazungumzo na majadiliano yenye faida.

Kiongozi wa Kanisa Katoliki Duniani  amesema mustakabali wa jamii ya mwanadamu utajengeka katika msingi wa mazungumzo baina ya dunia na tamaduni na kuongeza kuwa kuna ulazima wa kufanyika mazungumzo baina ya  dini ili kufanikisha amani na kukabiliana na malumbano.

Papa Francis Akiwa na Sheikh Mkuu wa Al Azhar mjini Cairo, 2017/29/04

Safari ya Papa nchini Misri inafanyika katika mazingira ya ulinzi mkali ikiwa ni wiki tatu tu baada ya hujuma za kigaidi zilizolenga makanisha ya Kikhufti nchini Misri.