JIJI LA ARUSHA LATOA MIKOPO YA SH 405 MILIONI KWA WANAWAKE NA VIJANA

Mstahiki Meya wa Jiji la Arusha,Kalist Lazaro akionesha aina ya Vyeti za usajili wa vikundi vinavyotolewa na Halmashauri hiyo wakati hafla ya kukabidhi hundi za mikopo kwa vikundi 30 vya wanawake na vijana kushoto ni Naibu Meya,Viola Likindikoki,Afisa Mipango Miji wa Jiji la Arusha,Mariamu Kimolo na Diwani wa Kata ya Themi,Melas Kinabo.Picha na Filbert Rweyemamu

Mstahiki Meya wa Jiji la Arusha,Kalist Lazaro(kushoto)akikabidhi mfano wa hundi kwa kikundi cha Umoja wa Kata ya Kimandolu wakati wa hafla ya kukabidhi hundi za mikopo kwa vikundi 30 vya wanawake na vijana yenye thamani ya Sh 403 milioni.

Naibu Meya wa Jiji la Arusha,Viola Likindikoki akiwapongeza wanawake kutoka vikundi mbalimbali katika halmashauri ya jiji la Arusha waliopekea mikopo yenye thamani ya Sh 403 milioni kwaajili ya shughuli za maendeleo katika hafla iliyofanyika .

Wanavikundi 30 kutoka Kata za Jiji la Arusha walionufaika na mikopo iliyotolewa na Halmashauri ya jiji hilo yenye thamani ya Sh 403 milioni kuwawezesha wananchi kujiajiri.

Arusha.Halmashauri ya Jiji la Arusha imetoa mikopo yenye thamani ya  Sh 405 Milioni  kwa vikundi 30 vya Wanawake na Vijana ikiwa utekelezaji wa kanuni ya kutenga asilimia 10 ya mapato ya ndani kwa makundi hayo.

Akizungumza wakati akikabidhi hundi kwa vikundi vilivyonufaika ,Mstahiki Meya wa Jiji la Arusha,Kalist Lazaro alisema kuwa fedha hizo zitumike kwa malengo yaliyokusudiwa ili kuwawezesha wananchi wengine kukopa.

"Hizi fedha sio sadaka ni mikopo ambayo mnatakiwa kuzirejesha kwa riba ya asilimia 10 tu pekee ambayo huwezi kuipata sehemu nyingine hivyo ni imani yangu kuwa mtarejesha kwa wakati kupitia vikundi mama yaani Saccos na Vicoba kwenye Kata zenu,"alisema Kalist 

Alisema vikundi vitakavyorejesha kwa wakati vitafikiriwa kukopeshwa fedha tena na kuongezewa kiwango na vitakavyoshindwa hatua za kisheria zitachukuliwa ikiwa ni pamoja na kunyimwa mikopo hiyo katika Kata husika.

Naye Naibu Meya wa jiji,Viola Lindikikoki  alisema mikopo hiyo inatolewa bila kujali itikadi za vyama vya siasa au namna nyingine yeyote kwani maendeleo ni kwaajili ya wananchi wote na wamejipanga kuwatumikia.

Alisema mikopo kwa vikundi itakua ikitolewa kila baada ya miezi mitatu badala ya mara moja kwa mwaka hivyo kuwataka wanawake na vijana kubuni miradi itakayowaingizia kipato kwa kujishughulisha katika ujasiriamali.

Jiji la Arusha lina jumla ya vikundi  vya vijana 132 na vikundi vya wanawake 263 na kila mwaka wa fedha hupatiwa mikopo yenye masharti  nafuu huku mwaka 2013/14 halmashauri ilitoa mikopo yenye thamani ya Sh 194 milioni na mwaka 2014/15 vikundi vilipokea kiasi cha Sh 13 milioni.