Mamilioni yahitajika kutoshereza mahitaji ya maji Jijini Arusha

Arusha

Zaidi ya Dola za Marekani 158 milioni zinahitajika ili kumaliza matatizo ya maji katika jiji la Arusha kutokana na miundombinu ya zamani kuchakaa na idadi ya watu kuongezeka.

Akizungumza juzi,Mkurugenzi wa Mamlaka maji safi na maji taka mjini Arusha(Auwsa)Mhandisi Ruth Koya  alisema kumekuwa na malalamiko kutoka kwa wananchi juu ya huduma wanazotoa bila kufahamu changamoto wanazokabiliana nazo.

Alisema kwa sasa mahitaji ya maji kwa siku ni lita za ujazo  milioni 93, huku kwa siku uwezo wa Auwsa ni  lita za ujazo milioni 45  na kiasi kinachopotea ni kati ya asilimia 30 hadi 36.

Mhandisi Koya alisema kwasasa mamlaka inatumia mikakati ya muda mfupi kulingana na kiwango cha pesa wanachopata  ili kuhakikisha wananchi wanapata huduma za maji.

Katika mpango huo kisima cha zamani cha Moshono ambacho kilikuwa na uwezo wa kutoa lita 16,000 kwa saa baada ya kuboreshwa kinatoa lita 36,000 kwa saa moja wakati visima vipya vimechimbwa kwenye eneo la Sombetini chenye uwezo wa kutoa lita za ujazo 60,000 kwa saa.

Kisima kingine kimechimbwa eneo la Sokon I chenye uwezo wa kutoa lita 30,000 kwa saa huku maeneo yanayotarajiwa kunufaika ni  pamoja na Sokon I,Engosheraton na Uswahilini.